Совет

Еден жабындыларының түрлері

Қыш тақтай жүктеме көп түсетін және ылғал бөлмелерге арналған. Фактура, түс, сурет ауқымы кең, бағасы да қолжетімді. Мұндай тақтай оңай жуылады, қатты ластанбайды. Сонымен қатар жабындының бұл түрі жылуды жақсы өткізеді және «жылы еден» жүйесімен толық үйлеседі. Көбіне ванна, дәретхана, асүй және кіреберісті әрлеу үшін қолданылады.

Қыш граниттің де қолданылу аясы жоғарыдағыдай, өте берік. Бірақ тақтаймен салыстырғанда оның түрі аздау.

Ламинат — тіктөртбұрышты тақтайша түріндегі жасанды, көп қабатты жабынды. Ламинаттың коммерциялық сұрыптары адамдар көп жүретін ғимараттарды әрлеу үшін қолданылады. Жабынды жылыту жүйелерімен бірге қолданылуы да мүмкін, бірақ сипаттамасы жағынан мұндай едендер қыш тақтай мен қыш граниттен бір саты төмен. Ламинаттың жылу және дыбыс оқшаулау қасиеттері төмендеу. Төсем бұны аздап жақсартуға мүмкіндік береді. Ламинат қонақбөлме, жатынбөлме және балалар бөлмесін әрлеу үшін қолданылады.

Паркеттік тақта — табиғи ағаштан дайындалған еден жабындысы, оған ағаштың бағалы түрлерінен дайындалған, лак немесе май жағылған жұқа тақтайшалар желімделеді. Паркеттен өзгеше мұндай жабынды монтаждан кейін қосымша өңдеуді қажет етпейді және пайдалануға толық дайын. Жылыту жүйелерімен бірге қолдануға болады, оюлы безендіру жасауға болады. Табиғи ағаштан дайындалған кез келген жабынды сияқты паркеттік тақта да мықтылығымен ерекшеленеді, пайдалану режимін (белгілі бір температура мен ылғалдылықты) сақтауды талап етеді, сондықтан да тұрғын үй бөлмелерінде (қонақбөлме, жатынбөлме, балалар бөлмесі) пайдаланылады. Жоғарыда сипатталған жабындылармен салыстырғанда жылу және дыбыс оқшаулау қасиеттері жоғары.

Массивті ағаш тақта табиғи ағаштан дайындалған таза экологиялық материал болып табылады. Эстетикалық, жылу мен дыбысты оқшаулау қасиеттері керемет, кез келген түспен үйлесіп, текстурасы әртүрлі болуы мүмкін. Тиісті күтім жасалған жағдайда ұзақ уақыт пайдаланылады, бірақ пайдалану режимін (белгілі бір температура мен ылғалдылықты) сақтауды талап етеді, пайдалану жағдайы бұзылса, тұтыну қасиеті жойылады. Сонымен қатар мұндай жабынды беріктілігімен, әсіресе, соққыға төзімділігімен ерекшеленеді. Әдетте, қонақбөлмеде және жатын бөлмеде пайдаланылады.

Тығын жабынды — эстетикалық, жылу мен дыбысты оқшаулау қасиеттері керемет табиғи экологиялық материал. Жылы, жұмсақ, берік материалдың текстурасы мен түсінің ассортименті мол. Бұл жабынды температура және ылғалдың өзгеруіне сезімтал емес. Бұл үй кинотеатры бар қонақбөлмелер мен жатынбөлмелерге жарамды.

Ковролиннің беткі қабаты түкті, жылы, сондықтан да күнделікті тұрмыста қолданылатын кілемді еске түсіреді. Айырмашылығы – ковролин бөлмедегі бүкіл кеңістікті алып тұрады. Бұл өте жұмсақ, жылы және жайлы материал, жылу мен дыбысты жақсы оқшаулайды, фактурасы мен түсі көп, қолжетімді. Бірақ шаң-тозаңды көп жинайды, ылғал бөлмелерге төсеуге болмайды, тез ластанады, жоғары жүктемеге арналмаған. Сондықтан көбіне жатынбөлмеге төселеді.

Линолеум — фактура, сурет, түс және баға диапазоны бойынша кеңдігімен ерекшеленетін ең танымал жасанды материал. Су мен кірдің әсеріне төзімді, оңай жуылады және төселеді. Жылу мен дыбысты оқшаулайтын қасиеттері орташа. Төсегеннен кейін алғашқы күндері өткір иісі болуы мүмкін. Тұрмыстық линолеум ұзақ уақытқа төзбейді және жоғары жүктемеге арналмаған, жапырылған жерлер тез пайда болады. Коммерциялық санаттағы линолеумде мұндай кемшіліктер жоқ, бірақ әлдеқайда қымбат. Негізінен, асүй мен кіреберіске төсеу үшін қолданылады.

Құйылатын едендер бастапқыда өндірістік-қойма кешендерінде пайдаланылатын, сондықтан да берік. Монтаж кезінде полимерлер мен шайыр пайдаланылады, ал алынатын жабындының гидрооқшаулағыш қасиеті бар және кірленуге төзімді. Негізінен дәретхана мен ванна бөмелеріне төселеді.